08.11.2005 (星期二) 陰--->雨天

第十一天:

札幌市內遊

住宿: 東橫Inn北口

行程簡介:

今日係札幌市內遊，主要既地方就係行百貨公司購物，不過朝早本來想去試下係 Sapporo Factory 啤酒廠既一個無料啤酒見學，點知去到一丁友都無，等左一段時間見唔對路就決定行街街算數 !

返到香港搵返d資料原來係另外一邊個個Shopping Mall到。跟住我哋就展開o左Shopping之旅，成日都買o左唔少既野，可以話係滿載而歸同埋大出血呀。

午餐就係 Sapporo-ESTA既地庫食品街到食，條食品街都真係有好多間食店，真係花多眼亂呀。最後我哋一間叫The 丼既食店食o左d定食午餐，價錢適中味道都唔錯，呢條食街都係搵食之選，重見到有間Fancl-House添呀，入面既Product大部份到係平過香港有成半有多，本來見到其他野，譬如花茶包同埋其他野都想買，不過因為個行理o急無咩位，所以都係放棄o左。

所以我哋都買o左少少野，之後就繼續我哋既血戰之旅。跟住行到去大丸札幌店既地庫個一層既Food Plaza，又係有好多野食，係免費既試食喎，d蛋糕半件半件咁試，食到我哋兩個飽晒。係因為係到試食食到飽晒，攪到我哋原本諗住係今晚去食既蝦蟹大戰既蟹放題都擱置 o左，因為食到好飽，如果去食放題戰鬥力就會大減同埋會覺得好唔抵架嗎，所以今晚既晚餐就變o左Food Plaza美食大集會喇!