廈門沿海,當然要食海鮮,不過我地唔熟地頭,又冇乜資料去邊到食唔會出事....我絶對唔想在旅程之中跟同房爭廁所!!我知佢都唔想。所以,即使在鼓浪嶼有好多食海鮮的小店,我們都過門不敢入,考量衛生問題之外,亦怕誤入黑店,俾人「放血」,始終得四個女仔,萬事小心為上。

所以,最後我地選了一間由旅店徒步約十五至二十分鐘的"大酒家"進餐,起碼它門面乾淨明亮,明碼實價,加上當時都幾多客,應該唔太差...結果冇選擇錯!

依隻蝦成隻手咁大,仲好鮮甜!


其餘菜色,依三碟中以聖子最惹味!不過另外兩碟味道都唔差!


連埋其他兩個普通菜式,每人食咗百幾蚊人仔。
冇特別諗住推介這間酒家,因為覺得雖然唔錯,但冇話唔食唔得,我相信喜歡食海鮮又比我地大胆的,在廈門好容易就搵到食。

反而想分享下在尋食的途中遇到的事:話說第二晚我地本來打算在另一間酒家(價錢貴過香港)食海鮮,但當晚現場有婚宴,而服務員為我地安排的座位,就在婚宴酒席旁邊(中間以小花槽阻隔),一對新人進場的道上.....除了"騎厘"外,個婚禮MC好似high大咗咁,不停咁講嘢,佢個咪仲係演唱會聲浪的分貝,吵到跟本同隔離位講嘢都有困難....結果,我忍唔住黑面同要求離開。

唔止依間,上面食咗嗰間其實都好神奇,因為除左我地之外,其餘每一枱在餸菜上桌前都在玩骰仔,應該是他們一個中秋節習俗(我上年去時臨近中秋),在一個去飲盛"翅"那些大碗中擲骰仔,輪流擲,唔知佢地賭甚麼,只知道叫囂聲此起彼落,我覺得自己好似去咗賭場開餐咁。

加上我後面枱那位仁兄,唔知點解一餐飯跌三次櫈,每次"呯"一聲成個椅背喺我"後尾枕"掠過,佢寧願每次彎腰執櫈,都唔喺起身前拉一拉張櫈!"真趣緻"!! 最後,我終於忍唔住喺佢又又又跌櫈之後,擰轉身望住佢,然後,咧開嘴笑,佢終於一臉尷尬跟我說了聲抱歉。
笑一笑果然世界更美妙。: )