黑椒小雞扒　～　打低老土心型牛扒 - 2012年11月9日

黑椒雞扒飯，是中學午飯的回憶。　黑椒汁原來可以自製，豐富的乾蔥、蒜、甜椒，每口都有好飽滿的感覺，比茶餐廳生粉槳好味太多了！起碼有Soho區食Hip Dinner級數！

落本錢者，去高檔凍肉買靚雞扒，搵隻靚碟，聖誕燭光晚餐唔駛次次煎心型牛扒，呢個易整好多！

黑椒小雞扒 由金門莊私房菜　娥姐　提供

材料 　　
雞脾２隻　

黑椒汁
蒜蓉
乾蔥２粒，切碎
黑椒碎　２湯匙
青、紅甜椒粒少少
１杯湯
蠔油、生粉、老抽

做法
１．雞脾起骨。　雞脾的關節位用刀「壓」下，可斷開關節，先後沿骨用刀片開，刮清骨邊肉，就可以成條骨拿出來。下部會有少少細骨，都要起清。
２．雞脾肉用刀拍拍、修成厚薄均勻，切成可一口吃下的細塊。
３．薑汁、酒、生抽、少少糖醃雞肉。　糖不能多，待會煎會焦。　最後加少少生粉，撈勻。加點油，放入雪櫃醃半小時左右。
４．放少少油燒熱平底鑊，先煎雞皮一面，會出油，然後反轉煎肉。
５．當油燒到熱紅時，可關火，用鑊鏟壓下雞扒來煎，蓋上焗一陣，再開火煎多一陣，如此雞肉可以煎皮脆得滑。煎好就放碟上
６．用雞扒餘下的油，爆香蒜蓉和乾蔥，加入黑椒碎同炒，灑點酒，放湯。 此時放蠔油或糖鹽調味 ，放青紅椒粒兜炒。打芡至掛芡汁。　最後才落幾滴老抽上色。
７．將黑椒汁趁熱淋上雞扒上，完成！

娥姐貼士
鍾意新鮮雞可以，但是今次做有濃汁醬，而且要煎，用脾肉比胸肉好，用冰鮮會更好。
冰鮮雞煎到差唔多熟會出少少血汁，是正常的，代表快熟