|
 

沒有風的國度 / FINGERGAP (Vocal :Fedor Yury)

派台日期: 2022-01-13  
唱片公司:SEEAHOLE
作曲:FINGERGAP
填詞:FINGERGAP
編曲:FINGERGAP
監製:FINGERGAP

謝謝你的支持
簡介

千呼萬喚始出來!香港土炮音樂人FINGERGAP推出Holunjeng旗下首張原創單曲《沒有風的國度(City without Wind)》,誓要締造廣東歌新風潮!FINGERGAP睇中精通廣東話兼長住香港嘅哈薩克韓國混血歌手Fedor Yury獨特嘅歌聲,特意邀請佢擔任主唱,並希望憑《沒有風的國度》一曲將地下footwork曲風帶入香港樂壇同廣東歌市場。FINGERGAP熱衷香港以至世界各地嘅地下樂壇,因此將所見所聞轉化為全球首支footwork廣東歌,演繹佢對地下樂壇嘅呢份興奮。FINGERGAP於Holunjeng廠牌旗下嘅大碟亦快將面世,大家拭目以待!

好多人都會將廣東歌同慢板情歌畫上等號,不過事實上早喺八、九十年代,香港流行過唔少快歌,而本土創作人FINGERGAP就希望一改現代廣東歌嘅刻板印象,為廣東歌注入前所未有嘅生氣。

身兼創作人同攝影師嘅FINGERGAP喺節目中講述佢創作音樂嘅心路歷程,以及點樣產生將廣東歌同重敲擊感嘅芝加哥電子音樂footwork互相結合嘅意念。

訪問一開始,FINGERGAP就解釋佢個名嘅來頭:「FINGERGAP聽落有啲鹹濕,但其實係由我中文名變出嚟。」揭開咗呢塊神秘面紗之後,FINGERGAP繼續分享佢創作同做DJ嘅故事:「我基本上係雙管齊下,一邊創作屬於自己嘅廣東歌,一邊將佢哋好好咁remix。」FINGERGAP早前推出合輯《小心地滑》,將六十年代到千禧年代嘅經典廣東歌加快節奏,再融合160 bpm嘅footwork節拍同音效。

FINGERGAP嚟緊2022年初喺Holunjeng Records發行嘅新作,可以話係《小心地滑》嘅續集。新作入面,佢會繼續將廣東歌糅合footwork,唔單止難度十足,而且更係前無古人嘅構思!「Footwork同情情塔塔嘅廣東歌好唔同,廣東歌多以慢歌為主,而且通常打造成K歌。其實香港喺八、九十年代興過快歌,不過K歌出現之後,主流音樂嘅節奏就變得越嚟越慢,主題亦開始欠缺新意。」

由funk、jazz、hip hop 同drum n bass轉化而成嘅footwork,節奏啱啱係廣東歌嘅一倍,就係呢個巧合,啟示FINGERGAP為廣東歌注入新元素。「呢個就係好玩之處,我哋仍舊可以跟住唱,但係同時又可以搞搞新意思,跟住個beat一齊『un』,有時呢種急躁嘅節奏仲會聽到人有啲炆。」

呢一切嘅靈感,源自FINGERGAP對廣東話、香港文化同廣東歌嘅愛。「廣東歌係我嘅母語,聽到好聽嘅廣東歌總會有一份莫名嘅親切感,就係呢份感覺啟發我用廣東話去創作,為呢個豐厚又多姿多彩嘅文化添加多一層色彩。」

香港嘅人、事、物同樣豐富,電影、藝術、音樂都可以轉化成創作靈感,而FINGERGAP搵靈感嘅方法,就係行街。「我經常周圍遊走,用voice note去記低靈感同構思。」FINGERGAP 夥同 Holunjeng Records 嘅長期戰友、精通廣東話同多國語言嘅 哈薩克裔唱作人Fedor Yury,正密鑼緊鼓籌備將於 2022 年登場嘅大碟,打造多首香港樂壇前所未有嘅驚世作品。「我喺mix舊廣東歌嘅時候,刻意唔想同原作太似。雖然好多sample都係九十年代嘅歌曲,不過我希望可以令聽嘅人以一個新嘅角度去欣賞,激發同以往唔同嘅感覺。」

FINGERGAP而家嘅目標係展望將來。「好多人都幻想可以時光倒流,返去香港曾經風光、曾經好國際化嘅年代,但身為香港人,我仍然相信香港風光嘅唔係只有過去,香港仍然有將來,仍然有值得我信嘅嘢。」

歌詞

輾轉於擁擠的車內
而早極厭倦
風景跟思憶在倒回
而早極厭倦
窗中身影逐漸灰濛
而早極厭倦
怎想不起昨晚的夢
而早極厭倦

在沒有風的國度聽得見徬徨
在沒進展的每日總消耗希望
但就算依稀眷戀過往在腦中思考的渴望
在沒有風的國度始終會淡忘

輾轉於擁擠的車內
而早極厭倦
風景跟思憶在倒回
而早極厭倦
奔波於紛擾的街道
而早極厭倦
想歸家但路極迂迴
而早極厭倦

在沒有風的國度聽得見徬徨
在沒進展的每日總消耗希望
但就算依稀眷戀過往在腦中思考的渴望
在沒有風的國度始終會淡忘

隨著光陰的影子溢滿黑夜
世界忽然極傾斜
缺失的四季 散失的氣勢
沉睡中稍作躲避
夢醒的一剎卻尚在原地

在沒有風的國度聽得見徬徨
在沒進展的每日總消耗希望
但就算依稀眷戀過往在腦中思考的渴望
在沒有風的國度始終會淡忘